ევროპის ცნობიერების ცენტრი ღონისძიებაზე „საქართველოს ევროპული მომავალი და დამოუკიდებელი მედიის როლი”
2026 წლის 11 ივნისს ევროპის ცნობიერების ცენტრის აღმასრულებელი დირექტორი, გიორგი რობაქიძე, დაესწრო მიღებას „საქართველოს ევროპული მომავალი და დამოუკიდებელი მედიის როლი”, რომელიც ბრიუსელში, მედია-ლაბის სახლში გაიმართა.
ღონისძიება ორგანიზებული იყო Europe MédiaLab-ის მიერ, Promote Georgia-თან პარტნიორობით. საღამომ გააერთიანა ევროკავშირის ინსტიტუტების, დიპლომატიური მისიებისა და მედიის წარმომადგენლები, რათა განეხილათ დამოუკიდებელი ჟურნალისტიკის როლი საქართველოს შესახებ საჯარო დებატებისა და ქვეყნის ევროკავშირთან ურთიერთობის ფორმირებაში.
სტუმრებს სიტყვით მიმართეს: ევროპარლამენტის წევრმა მარკეტა გრეგოროვამ (მწვანეები, ევრონესტის საპარლამენტო ასამბლეის დელეგაციის ვიცე-თავმჯდომარე) და ევროპული პოლიტიკური კვლევების ცენტრის (CEPS) გაფართოების პროგრამის ხელმძღვანელმა თინათინ ახვლედიანმა.
აღსანიშნავია, რომ ღონისძიება გაიმართა საქართველოს შესახებ ანგარიშის ევროპარლამენტის პლენარულ სესიაზე დაგეგმილ კენჭისყრამდე რამდენიმე დღით ადრე, რაც დამატებით მნიშვნელობას ანიჭებდა დისკუსიას დამოუკიდებელ მედიასა და საქართველოს ევროპულ გზაზე.
მიღების ფარგლებში გიორგი რობაქიძეს საშუალება მიეცა ევროპარლამენტარ მარკეტა გრეგოროვასთან განეხილა საქართველოში არსებული ვითარება. ქალბატონმა გრეგოროვამ კიდევ ერთხელ დაადასტურა საქართველოს ევროპული მომავლისა და ქართული სამოქალაქო საზოგადოების მხარდაჭერა.
ევროკავშირის ცნობიერების ცენტრი გულწრფელ მადლობას უხდის Europe MédiaLab-სა და Promote Georgia-ს ამ დროული ღონისძიების ორგანიზებისთვის და იმ სივრცის შენარჩუნებისთვის, სადაც საქართველოს ევროპული პერსპექტივა კვლავ აქტიურად არის წარმოდგენილი ბრიუსელში გამართულ დისკუსიებში.
