საჯარო
ჩართულობა

პანელური დისკუსიის ფარგლებში განხილული იყო საქართველოში, მოლდოვასა და რუმინეთში მიმდინარე პოლიტიკური კრიზისები. ყურადღება გამახვილა შიდა პოლიტიკურ დაპირისპირებაზე, რუსეთის მავნე გავლენასა და მასთან ბრძოლის სტრატეგიებზე, ასევე სამოქალაქო საზოგადოების მნიშვნელობაზე და ბოლო პერიოდში მიმდინარე მოვლენების გათვალისწინებით აღმოსავლეთ ევროპის რეგიონში ევროკავშირის შესაძლო სამოქმედო სტრატეგიაზე.
საკუთარ გამოსვლაში გიორგი რობაქიძემ ხაზგასმით აღნიშნა, რომ რუსეთის მავნე ქმედებების წინააღმდეგ თანამშრომლობის კონკრეტული მექანიზმების განხილვამდე აუცილებელია რუსეთის ჰიბრიდული ომისა და გამოყენებული ინსტრუმენტების ბუნებისა და მასშტაბის სრულფასოვანი ანალიზი. მან ხაზგასმით აღნიშნა, რომ მოსაზრება, რომ კონფლიქტის „გაყინვა“ ან რუსთის სასარგებლოდ დათმობები, იმ იმედით რომ კომპრომისის საფუძველზე შესაძლებელი იქნება რუსეთთან მხრიდან შემდგომი აგრესიის თავიდან აცილება, სახიფათოდ მცდარია. ამის ნათელი მაგალითებია საქართველოს გამოცდილება 1990-იანი წლებიდან 2008 წლის ბოლო რუსული აგრესიისა და ოკუპაციის ჩათვლის და უკრაინის გამოცდილება „მინსკი I“ და „მინსკი II“ შეთანხმებებთან დაკავშირებით. ევროკავშირი უნდა გასცდეს რიტორიკული მხარდაჭერის ჩარჩოებს და შეიმუშაოს რუსეთის შეკავებისა და აღმოსავლეთ ევროპის რეგიონში სტაბილურობის მდგრადობის განმამტკიცებელი სტრატეგიული მექანიზმები.
გიორგი რობაქიძემ ამ მიმართულებით გასატარებელ ღონისძიებებზე საუბრისას გააჟღერა რამდენიმე კონკრეტული ინიციატივა კერძოდ:

• საქართველოსა და მოლდოვას ინტეგრირება ევროკავშირის ჰიბრიდული საფრთხეების სწრაფი შეტყობინების სისტემაში;
• ნატო-ევროკავშირის სტრატეგიული კომუნიკაციის კოორდინაციის გაძლიერება;
• სამოქალაქო საზოგადოებისა და დამოუკიდებელი მედიის მხარდაჭერა დეზინფორმაციასთან ბრძოლაში;
• ომისშემდგომი გეოპოლიტიკური რეალობის ფონზე, რუსეთთან შესაძლო შეთანხმებებისათვის, ევროკავშირის სტრატეგიული გამძლეობის ჩარჩოს შექმნა;

დასკვნით სიტყვაში გიორგი რობაქიძემ კიდევ ერთხელ ხაზგასმით აღნიშნა, რომ რუსეთის ფედერაციასთან, ნებისმიერი სახის შეთანხმება, ამ შეთანხმების რეალური აღსრულების ინსტრუმენტების გარეშე, კრემლის მხრიდან მხოლოდ ტაქტიკურ პაუზად განიხილება, რომლიც მიზანია არა მშვიდობის დამყარება არამედ შემდგომი დესტაბილიზაციისათვის ძალების მოკრება.
ევროკავშირის შესახებ ცნობიერების ამაღლების ცენტრი გულითად მადლობას უხდის ორგანიზატორებს მაღალ დონეზე ჩატარებული პანელური დისკუსიისათვის. ჩვენ ღრმად ვაფასებთ ამ ორგანიზაციების ერთგულებას ღია დიალოგის წარმოების, დემოკრატიული ღირებულებების გაძლიერებისა და ერთიანი ევროპული მომავლის ხელშეწყობის მიმართ.
ევროკავშირის ცნობიერების ცენტრი (EUAC) მტკიცედ უჭერს მხარს საქართველოსა და ევროკავშირში ინტეგრაციის მსურველი სხვა ქვეყნების ძალისხმევას, ევროპული ღირებულებების განმტკიცებისა და დემოკრატიული ტრანსფორმაციის პროცესში. ცენტრი გააგრძელებს საქმიანობას ცოდნის გაზიარების, პოლიტიკის ადვოკატირების და ავტორიტარიზმის წინააღმდეგ მიმართული ქმედებების გაძლიერების მიმართულებით, თანადგომისა და ევროპული სოლიდარობის საფუძველზე.