საქართველოს დამოუკიდებლობის აღდგენის თაობაზე 31 მარტის რეფერენდუმის წლისთავთან დაკავშირებით
1991 წლის 31 მარტს საქართველოს ხალხმა მიიღო ისტორიული და გაბედული გადაწყვეტილება. ეროვნულ რეფერენდუმში მონაწილე ამომრჩეველთა აბსოლუტურმა უმრავლესობამ მხარი დაუჭირა ქვეყნის დამოუკიდებლობის აღდგენას, 1918 წლის 26 მაისის დამოუკიდებლობის აქტის საფუძველზე. ეს რეფერენდუმი გახდა ქართველი ხალხის ერთ-ერთი ყველაზე მნიშვნელოვანი გადაწყვეტილება, რამაც საფუძველი ჩაუყარა ქართული სახელმწიფოებრიობის აღდგენას.
რეფერენდუმი ჩატარდა საკმაოდ რთულ პოლიტიკურ და ეკონომიკურ ვითარებაში, საბჭოთა კავშირის არსებობის ბოლო პერიოდში. მიუხედავად ზეწოლისა, გაურკვევლობისა და არასტაბილურობისა, საქართველოს მოქალაქეებმა მკაფიოდ გამოხატეს ნება ეცხოვრათ დამოუკიდებელ, დემოკრატიულ და ევროპულ სახელმწიფოში.
ევროკავშირის ცნობიერების ცენტრი მიიჩნევს, რომ 31 მარტის რეფერენდუმის მემკვიდრეობა მხოლოდ ისტორიული არ არის — ის ასევე პოლიტიკური და მორალური მნიშვნელობის მატარებელია. იგი წარმოადგენს ქართველი ხალხის მკაფიო ნებას იცხოვრონ თავისუფალ, დემოკრატიულ და ევროპულ ქვეყანაში. ეს არჩევანი არ შეცვლილა.
დღეს, ჩვენ კიდევ ერთხელ გამოვხატავთ პატივისცემას ქართველი ხალხის მიერ 1991 წელს მიღებული გადაწყვეტილების მიმართ და ვადასტურებთ საქართველოს დემოკრატიული განვითარების, ევროპული ინტეგრაციისა და სუვერენიტეტის მხარდაჭერას.