ევროკავშირის ცნობიერების ცენტრი კონრად ადენაუერის ფონდის ღონისძიებაზე
2026 წლის 13 ივლისს ევროკავშირის ცნობიერების ცენტრის აღმასრულებელმა დირექტორმა, დოქტორმა გიორგი რობაქიძემ, მონაწილეობა მიიღო მაღალი დონის პანელურ დისკუსიაში „ევროკავშირის გაფართოება: უკრაინა როგორც განსაკუთრებული შემთხვევა — დასავლეთ ბალკანეთი როგორც ნორმა?“, რომელიც ბრიუსელში, კონრად ადენაუერის ფონდის (KAS) ევროპის ოფისში გაიმართა.
დისკუსიის მთავარი თემა იყო, თუ როგორ შეცვალა რუსეთის აგრესიულმა ომმა უკრაინის წინააღმდეგ ევროკავშირის გაფართოების სტრატეგიული აღქმა და როგორ გაზარდა მისი მნიშვნელობა ევროპის უსაფრთხოების კონტექსტში. მიუხედავად იმისა, რომ ევროკავშირში გაწევრიანების ოფიციალური კრიტერიუმები უცვლელი რჩება, გაფართოების პროცესის დაჩქარების პოლიტიკური მზაობა მნიშვნელოვნად გაძლიერდა. ამან კვლავ აქტუალური გახადა ისეთი საკითხები, როგორიცაა გაფართოების ტემპი, ეტაპობრივობა და გაფართოებული ევროკავშირის მომავალი არქიტექტურა. დისკუსიის მონაწილეებმა იმსჯელეს იმაზეც, უნდა განიხილებოდეს თუ არა უკრაინა განსაკუთრებულ შემთხვევად, ხოლო დასავლეთ ბალკანეთის ქვეყნები და მოლდოვა — გაფართოების სტანდარტული პროცესის ფარგლებში, ასევე იმ შიდა რეფორმებზე, რომლებიც აუცილებელია იმისათვის, რომ გაფართოების შედეგად ევროკავშირი კიდევ უფრო ძლიერი და ეფექტიანი გახდეს.
ღონისძიება გახსნა გერმანიის ფედერალური საგარეო საქმეთა სამინისტროს ევროპის საკითხებში სახელმწიფო მინისტრმა გიუნტერ კრიხბაუმმა. პანელურ დისკუსიაში მონაწილეობდნენ ევროპარლამენტარი, ევროპის სახალხო პარტიის (EPP) წევრი და უკრაინის საკითხზე ევროპარლამენტის მომხსენებელი მიხაელ გალერი, გერმანიის საერთაშორისო და უსაფრთხოების საკითხების ინსტიტუტის (SWP) კვლევების დირექტორი დოქტორი ბარბარა ლიპერტი, აგრეთვე სხვა მაღალი რანგის პოლიტიკოსები და ექსპერტები.
ღონისძიების ფარგლებში გიორგი რობაქიძეს შესაძლებლობა ჰქონდა მოსაზრებები გაეცვალა ევროპარლამენტარ მიხაელ გალერთან, რომელიც საქართველოს ევროპული მისწრაფებების აქტიური მხარდამჭერია. საუბარი შეეხო ევროკავშირის გაფართოების საერთო პერსპექტივას, განსაკუთრებული ყურადღება დაეთმო იმ პირობებს, რომელთა არსებობის შემთხვევაში საქართველო შეძლებს ევროპული ინტეგრაციის გზაზე დაბრუნებას.
ორივე მხარემ ხაზი გაუსვა, რომ საქართველოს ევროპული მომავალი, პირველ რიგში, ქართველი ხალხის დემოკრატიულ ნებაზეა დამოკიდებული და რომ ევროკავშირში ინტეგრაციის პროცესის განახლება ქვეყანაში არსებული პოლიტიკური ვითარების ცვლილებას უკავშირდება. მიხაელ გალერმა კიდევ ერთხელ დაადასტურა თავისი ურყევი მხარდაჭერა საქართველოს ევროპული მომავლისა და ქვეყნის დემოკრატიული სამოქალაქო საზოგადოების მიმართ.
ევროკავშირის ცნობიერების ცენტრი მადლობას უხდის კონრად ადენაუერის ფონდს და გერმანიის საერთაშორისო და უსაფრთხოების საკითხების ინსტიტუტს ამ დროული და მნიშვნელოვანი დისკუსიის ორგანიზებისთვის და იმ სივრცის შექმნისა და შენარჩუნებისთვის, სადაც ევროკავშირის გაფართოების შესახებ სტრატეგიული დებატი აქტიურად გრძელდება.
