განცხადებები

მოხარულნი ვართ, ჩვენს გუნდში მივესალმოთ სამ გამორჩეულ ექსპერტს. ელენე გოცაძე არის საერთაშორისო განვითარების და საჯარო სექტორის პროფესიონალი, რომელსაც 20 წელზე მეტი გამოცდილება აქვს სახელმწიფო ინსტიტუტებსა და დონორების მიერ დაფინანსებულ პროგრამებში მუშაობის მიმართულებით. მისი პროფესიული საქმიანობა მოიცავს დემოკრატიულ მმართველობას, ევროპულ და ევროატლანტიკურ ინტეგრაციას, დეცენტრალიზაციას, სტრატეგიულ კომუნიკაციასა და ჰიბრიდული საფრთხეების მიმართ მდგრადობას. 2013–2016 წლებში იგი იკავებდა ნატოსა და ევროკავშირის საინფორმაციო ცენტრის დირექტორის პოზიციას, სადაც ევროკავშირსა და ნატოსთან მჭიდრო თანამშრომლობით საზოგადოებრივი ინფორმირებისა და ჩართულობის ეროვნულ კამპანიებს ხელმძღვანელობდა. მოგვიანებით აქტიურად იყო ჩართული USAID-ის პროგრამების განხორციელებაში, მათ შორის კარგი მმართველობის ინიციატივასა და ძლიერი სოფლის პროგრამაში, რომლებიც მმართველობის რეფორმებს, ადგილობრივ განვითარებას, მოქალაქეთა ჩართულობასა და ინსტიტუციური შესაძლებლობების გაძლიერებას ემსახურებოდა. მალხაზ სალდაძე ჯორჯ მეისონის უნივერსიტეტის კორეის ფილიალის ასისტენტ-პროფესორია. მან დოქტორის ხარისხი ჯორჯ მეისონის უნივერსიტეტის ჯიმი და როზალინ კარტერების მშვიდობისა და კონფლიქტების მოგვარების სკოლაში მიიღო. მას ასევე აქვს რუსეთის, აღმოსავლეთ ევროპისა და ცენტრალური აზიის კვლევების მაგისტრის ხარისხი ვაშინგტონის უნივერსიტეტის საერთაშორისო კვლევების ჯექსონის სკოლაში. იგი წლების განმავლობაში აქტიურად თანამშრომლობდა ქართულ სამოქალაქო საზოგადოებასა და კვლევით ინსტიტუტებთან, მონაწილეობდა სამხრეთ კავკასიის ტრანს სასაზღვრო ინიციატივებში და მუშაობდა კონფლიქტების მართვის, სამოქალაქო ჩართულობის, გენდერული თანასწორობისა და ევროპული ინტეგრაციის საკითხებზე. ეკატერინე ქარდავა არის სამართლის დოქტორი, იურისტი, ჟან მონეს პროფესორი და ევროპული ინტეგრაციის მკვლევარი. იგი არის 30-ზე მეტი წიგნის, სამეცნიერო სტატიის, კვლევისა და სახელმძღვანელოს ავტორი და თანაავტორი. ეკატერინე ქარდავას შემუშავებული აქვს თანამედროვე აკადემიური კურიკულუმები ევროკავშირის გაფართოების პოლიტიკის, საქართველოს ევროპული ინტეგრაციის, ევროკავშირ–საქართველოს ასოცირების შეთანხმების, სამართლებრივი აპროქსიმაციისა და ევროკავშირის სამართლის სფეროებში, რომლებიც დღეს საქართველოს სხვადასხვა უნივერსიტეტში ისწავლება. მას აქვს 29 წლიანი პროფესიული გამოცდილება, რომელიც აერთიანებს საჯარო სამსახურს, აკადემიურ საქმიანობასა და საერთაშორისო საკონსულტაციო მუშაობას. ეკატერინე ქარდავა არის Erasmus+ პროგრამის ფარგლებში განხორციელებული ხუთი ჟან მონეს პროექტის ავტორი და გამარჯვებული, მრავალი საერთაშორისო ფონდის მიერ მხარდაჭერილი პროექტის ავტორი და კოორდინატორი, ასევე ექსპერტი და კონსულტანტი ისეთი ორგანიზაციებისთვის, როგორიცაა FES, GIZ, ICMPD, USAID, UNDP და სხვა. იგი არის ასოციაციის „შრომისა და ევროპული კვლევების ინსტიტუტის“ დამფუძნებელი. ჩვენ მოუთმენლად ველით ერთად მუშაობას მაღალი ხარისხის კვლევების, ინფორმირებული დებატებისა, ევროპული ინტეგრაციისა და დემოკრატიული მმართველობის საკითხებში თანამშრომლობის ხელშესაწყობად.